踏入計劃嘅第二年，咁啱又係2022年，伍濤打算以「藝力・易行」計劃，繼續培育藝術導師、舉辦藝術體驗工作坊，祝福社區，以心靈健康，一起抗疫（逆）。今年更加入青年大使計劃，為青年人提供工作實習機會之餘，同時培養佢哋成為藝術導師。

伍濤相信，藝術係易行嘅，簡單嘅藝術，人人都可以成功！喺成功點上建立自信之後，又可以再深入探索藝術變化萬千嘅奇妙世界。藝術再唔係高不可攀嘅幻想，而係家家戶戶——不論出身、背景、地位、膚色、信仰，都可以擁有同創作嘅寶貝。

伍濤好想提供一個空間畀人探索藝術，建立想像力、創造力，營造好心情。以簡單易做嘅藝術，重拾童真，幫助大家輕鬆表達內心情感。藝術讓人有力量，讓人簡單而滿足，甚至令人對生活有更美好嘅想望，唔再覺得自己係「咸魚」、「災民」。

我哋誠意邀請你，成為「藝力・易行」嘅一份子：讓創造之美走入自己嘅生活；支持伍濤，繼續以藝術去建設好心情社區。